بروهي داد محمد خام
داد محمد خادم بروهي، ڊاڪٽر:ناليوارو محقق، اديب، شاعر، صحافي ۽ ٻولين جو ماهر ڊاڪٽر داد محمد ”خادم“ بروهي ولد نيڪ محمد بروهي، 4 مارچ 1940ع تي جيڪب آباد ۾ پيدا ٿيو. ابتدائي تعليم جيڪب آباد ۽ ڪشمور مان حاصل ڪيائين. ايم. اي بعد 1991ع ۾ سنڌ يونيورسٽيءَ مان پي. ايڇ. ڊي ڪيائين. سندس پي. ايڇ. ڊي جي تحقيقي مقالي جو عنوان ”سبي خطي ۾ سنڌي زبان جي محاورن جو لساني جائزو“ هو. کيس پنجن ٻولين سنڌي، براهوي، سرائيڪي، اردو ۽ پنجابيءَ تي دسترس حاصل آهي. پاڻ انهن پنجن ئي ٻولين ۾ لکي رهيو آهي. صحافت سان سندس پراڻو تعلق آهي. سنڌي اخبار ”کيرٿر“ ۽ براهوي اخبار ”ايلم“ سان، جيڪا مستونگ مان نڪرندي آهي، منسلڪ آهي. جيڪب آباد جي مشهور هارس اينڊ ڪيٽل شو جي موقعي تي شايع ٿيندڙ مخزن ۾ ادبي ۽ علمي معاونت ڪندو رهيو آهي. ڪيترن ئي سالن کان مختلف اخبارن ۽ رسالن ۾ سنڌي، براهوي ۽ بلوچي ٻولين جي محاورن ۽ لهجن جي باري ۾ مضمون لکندو پيو اچي. سندس مقالا جامع ۽ دلچسپيءَ سان ڀرپور هوندا آهن. ڊاڪٽر داد محمد ’خادم‘ بروهيءَ جا ٻه ڪتاب سنڌي لئنگئيج اٿارٽيءَ ڇپايا آهن. (1) سنڌي براهوي ٻوليءَ جو تقابلي جائزو (1994ع)، (2) براهوي لغت'>سنڌي براهوي لغت (2004ع)، ان کانسواءِ سندس هڪ ڪتاب ”بلوچستان ۾ سنڌي ٻولي ۽ ادب جائزو“ اداري وٽان ڇپائيءَ هيٺ آهي. ان کان اڳ سندس ڪتاب ”مٺڙا مارو“ پڻ ڇپيل آهي. نوٽ : ڊاڪٽر داد محمد ”خادم“ بروهي 10 مئي 2014ع تي وفات ڪئي.
1940.03.04 عيسوي
ڊاڪٽر داد محمد ” خادم “ بروهي 4 مارچ 1940ع تي جيڪب آباد ۾ پيدا ٿيو
2014.05.10 عيسوي
ڊاڪٽر داد محمد ”خادم“ بروهي 10 مئي 2014ع تي وفات ڪئي.